ENGLISH/INUKTITUT
traditionandtransition@mun.ca        

Tânna AngajukKâk Nalunaikkutanga ilingajumut kinakkutuinnanut IlauKatautiKagiamut Ikajuttigennik tunijaujuk omunga Double Mer Nuvuani Itsasuanittavininnik Suliangujumut

Dr. Lisa Rankin Memorial Ilinniavitsuanganit Itsasuanittavininnik SuliaKapvinganit amma Rigolet AngajukKânga, Jack Shiwak, aittutausimajuk tânna ilinniavitsuap AngajukKâp Nalunaikkutanganik ilingajumut kinakkutuinnanik IlauKatauKattanimmut Ikajuttigennimut Decembera 16, 2016-nami. Tânna nalunaikkutak ilingasimajuk Inuit nunalet-sivukkatiutlutik itsasuanittavininnik aggasimammata iningani Double Mer Nuvuani, ikittutuinnanik kilumetanik silatâni Rigolettimit.

“Nallinattutuinnaulauttuk Memorial Ilinniavitsuanga ilitagijaugiamut ikajuttigennimik akungani Nunalimmik Rigolet amma aggatinnut amma ilinniavimmejunut suliaKapvingani Itsasuanittavininnik Memorial Ilinniavitsuanga. Tânna nalunaikkutak ullusiuvuk Kaujisattaulauttumut pigiasijautluni nunalimmut angutigiamut nunalet tugâgutinginnik. Tamâkasâk silatânimiut Kaujisattet sakKititsiluaKattajut sunanik KaujisattuKaniammangât. Tamannali tamakkua aggatet pigunnasilauttut ilisimajanginnik ikajutsigiamut nunalinnik. Atautsikut, tainna Kaujisattaulauttuk iningani Double Mer Nuvuani ikajuttigellagilauttut. Ilisimallagillunga ilinniatitsisongulaukKunga pejagesimangitunut amma pijagesimajunut ilinniavimmejunut taikkutigona ininga agganikkut amma atutluta Kaujijausimajunut napvâtaulauttunut kiusongugiamut apitsotinnik pitjutiKajunut Inuit PiusituKavininginnik nunakKatigengitumi. kajusiutigigunnalauttavut suliatsavut ilonnatik ilauKatautillugit.”

 

Rankin itsasuanittavininnik suliaKasimasongujuk Kanitangani Rigolettimi ilangagijautluni PiusituKannik amma Asianguvalliajunut Kaujisattinut Ikajuttigetlutik, pisongusimajut kenaujattâsimammata tâkkunangat Inuligijet Kaujisattilagijinnit amma Inunnut Kaujisattet kaunsallinginnit Canadami. Jâringani 2013 tânna Rigolet Inuit Nunalet kavamanga aiviKalauttut omunga Dr. Rankin suliagijamminik pijagetilluni itsasuanittavininnik suliagisimajamminik SiKingani Satjugiami takugumatluni KanuttogutiKajuKagajammangât pivalliatitsigiamut itsasuanittavininnik iningani silatâni nunalimmit iningani Double Mer Nuvuani. Ikajuttigennik sakKititaulauttuk takujauniattunut Dr. Rankin amma ilinniatitsijanginnik Rigolettiliagiamut atunik aujami aggagiattugiamut pingasunik piusituKait Inuit illusuanguKattalauttanginnik ukiumi illugijauKattasimajunut. 

 

Imailingagaluattilugu itsasuanittavininnik agganinga pijagegiaKangikaluatluni tapvani aujami, inigijanga Kaujimajautsialigettuk niuggugiattuKattajunut amma nunalimmiunullu taimâtsainak. Nunalimmiut takuniagiattulimmata sunanik aggatet napvâsimammangâmmik, ikajuKattajut nalunaitsigiamut piKutigalannik ilaget aggasimajanginnik. Rankin amma ilagijangit tigusinginnatut nunalimmiunik aujami suliaKaniattunut ilinniaKattajunullu.

 

“Piujummagiuvuk suliaKaKatiKagiamut nunalimmik suliatsamik ilinganigijanginnut. Mikijuk nunagijaujuk sollu Rigolet tigumianginnalungitut ilisimajunik namminik nunagijanginnik pivitsaKattisiniattumik pijagegiamut suliatsanik tâtsutinutsainak imminik. Tânna ikajuttigennik ilautitsisimavuk ilinniatitsigiamut Rigolet inosuttunginnik tâpsuminga ikajuKattajunut. PivitsaKattisisimammijuk uvannik tigusigiamut ilinniavimmejunit St. John’s-imit amma nakituinnak suliaKagiattugiamut ininganut” uKajuk Rankin. “Taikkua ilinniavimmejut tigulauttaka Memorial Ilinniavitsuanganit ililauttut unuttumaginnik Inuit ilikKusinginnik amma inosigijauKattajunut taggâni Inuit nunalimmi. KanuttogutiKavunga taimâtsainak atugiamut sakKititsiniattuk initsagijauniattunut sivunitsatinnik ikajuttigesonut tamakkua ilinniavimmejut pigiasitillugit suliatsagilâttanginnik imminik.”

 

Rigolet pijagetainnatut sanatlutik Taggangani Amerikkaup takinippângujumik Kijulimmik pisupvimik nunalik isuanetluni amma itsasuanittavininnik iningani iluanetluni. Tânna nunalik ungatânituinnak 300-inik inuKatluni sâlaKasimajut taikkuninga metropolis ininganit Atlantic City, NJ-imiunik taikkua sivunga tigumialauttut takinippângujumik. Tugâgutigisimajangit pivalliatitsigiamut tânna Double Mer Nuvuani iningata tikipvigijaulluni nâjigianganut pisupvimik ilingattilugu niugguKattajunut Kângijunut aujami.

 

“Pivalliataulimmat Mealy KakKasuangit Nunatsuami SilakKijâpvinga amma unutsivallialimmata umiatsuat inuttaKattajunut iniggajunut Labradorip satjugianganut, Rigolet pivitsaKasimajut pivalliatitsigiamut Inuit-ilinganiKajunut ilikKuset niuggunimmut,” tukisititsigiajuk Rankin. “Tânna pisupvik amma Double Mer Nuvungit ininga piujummagialuit tikipvigigiangit taikkununga ullutuinnamik aullanguaKattajunut.  Amma nâjisimalimmata niuggusimanningit tamakkua niuggutet aullaKattaniattut Kaujimallutik anginitsanik pitjutigillugu nunalimmik.”

 

Ilinniagiallagiamut pitjutigillugu tânna Double Mer Nuvungata Itsasuanittavininnik Suliagijaujumik, takuniagajakKusi tâpsumunga APTN Takugatsaliusimajanginnik Omajuit Itsasuanittavinet (http://aptn.ca/wildarchaeology/episode-guide/) takutitsijumik maggonik sanajausimajunut ilingajumut aggatausimajumut.