ENGLISH/INUKTITUT
traditionandtransition@mun.ca        

IlikKusimmi NunaitNunamik-ilinganiKajuk Kanuittailigiamut iluani Nunatsiavut Ilikkuset NunaKutingit

Mai 2018

KaikKujausimajuk sakKititsisimajuk omunga: Edward Allen, PhD Ilinniajuk, Memorial Ilinniavitsuangani

Atiga Edward Allen Nukatlik amma Rigolet-imiunguvunga. Sollu atâtagatut, ikajusimalikKunga unuttumaginnik jârinik ilinganiKajunut Kanuittailinnimut. Piutsanginnavunga sangijonninginnik, aittuigumanginnatunut, nunalik, amma ijunginnaKattaninginnik Nunatsiavummiutittinut, amma Kanuk tigusisongunnitinnik amma tigumiasongunnitinnik Kanuingigiamut iluani ilangani apomautigijauKattajunut. Tusaumasimavunga inunnik ilagennigijangit nunamut atuniKatsiamagittuk Kanuk Kaujigiamut ilinganiKatiKaKattamangâmmik isumanginnut, timikkut, amma inulimânegalaKattagiamut Kanuingigiamut. Nunammegiamut nalunaittauKattavut âkKitigiutluni.

Ilinnialuagumavunga pitjutigillugu piusigijauKattajumut Kanuk nunammegiamut âkKitigivalliatitsiKattamangât. Sollu ottotigillugu, ilangit inuit uKaKattajut ippiniajut sollu nogunnangiumatlutik, siamangatlutik, amma tataKattajut nunammelimmata. Ilangit uKaKattajut kinaunningit, tannikut, amma ippiniaKattajut ilinganiKatsianinginnik pisimaKattajuk nunamit, ilinniaKattajut sungiutisongugiamut, Kinuitsânimmik, imminik pisongugiamut, amma pivalliasongugiamut asinginnik tigumiajanginnik ikajuKattajunut ullumit ullumut inogasuatuinnasongugiamut.

UppiniKavunga ilitatsigajakKugut amma nittugillugu âkKitigijauKattajumik piusinginnik sulijugitsialugu Kaujisannikut, suliagijaulluni katingalutik ilikkusikkut illigijaujutigut amma Kanuttogutigijaujutigut, ilaukKujiliaKigajattumik ilisimallagijunut Nunatsiavummiunik. Taimaittuk Kaujisannik nalunaitsigiallagajattuk âkKitigijauKattajunut illigijaujunut Inuit piusingitigut pinianniKatillugit amma sunaligilimmata Kangatuinnak atulimmata amma tigumialimmata Kanuingigiamut.

Mânnaluatsiak ilinniavimmevunga Memorial Ilinniavitsuangani iluani SuliaKapvingata Nunaligijiujunut. KanuttogutiKavunga atugiamut tâpsuminga tataminattumik pivitsamik ilinniagiallagiamut Inuit Kanuingigiamut atuKattajanginnik amma Kanuk atattisiKattamangâmmik nunamut. Pitsiagasuallunga KinijalâkKunga tasiugiattaugiamut amma angittaugumallunga Nunatsiavut kavamangata Kaujisapvet SuliaKapvinganit uKâlaKatiKasongugiamut inunnik atunik uvagut nunalinnit. KanuttogutiKavunga inunnik napvâgiamut atuKatiKagumagajattunut unikkausinginnik amma Kaujimajanginnik pitjutigillugit:

  1. Tamâgennik sivunganimit amma mânnaluatsiak Kanuingigiamut atuttauKattajunut ilingajunut Labrador Inunginnut,
  2. Suna nunammelluni âkKitigiKattajong, ammalu
  3. Kanuk tamakkua ikajuKattamangâmmik tigusigiamut amma tigumiagiamut uvagut Kanuingigiamut iluani asinginnut iniujunut inosittini.

Taikkua sunatuinnait atuKatigettaujut ilijauniattilugit allaKutimmut nalunaitsiniattumik atjiKangitumik Inuit Kaujimajanginnik. Tainna allaKutik atuttausongullunillu kinatuinnanut Kaujigiallagumagajattunut pitjutigillugu nunami-ilinganiKajunut Kanuingigiamut Nunatsiavummi. Ilagiatsilangajuk piguvalliajumut Inutuinnanut sivukkatigijaujumut Kaujisanninik ilinganiKajunut nunami-ilinganiKajut ilinniagatsanik amma suliatsanut amma atuniKatsiagajammijuk taikkununga pivalliatitsiKattajunut maligatsanik ilinganiKajunut Kanuingigiamut Nunatsiavummi.

UppiniKatsiavunga asingit silatsuamiut ilinniagajattut unuttumaginnik Inuit piusinginnik inotlutik amma Kanuk piKattamangâmmik isumagillugu Kanuingigiamut. Tâvatualli, Inuit piusigijangit Kaujimalluni tunijaugialik sulijugijaulluni amma asiKalugani piusigijaulluni sivulliutitsijumik ullumiulittumik amma sivunitsatinnut atuttaugiaKajunut Nunatsiavummi. Tânna ikajunnik amma tasiugiattaunik tâkkunangat PiusituKannik amma Asianottauvalliajunut Ikajuttigejut ikajulangavut kamagijautsiagiaKajunut tâkkua PiusituKannik Kaujimajaujut amma inosinnut atuttauKattajunut atuKatigettaujut kiggatuttaulangavuk piusiKalluni ilinganiKatsiatumik amma tukiKatsiatumik taikkununga Inutuinnanut amma KaujigatsaKatsialuni taikkununga Inutuinnaungitunut. Taimâk pimmata uvagut anginitsamik takutitsigajakKugut kajusiutigijaunginnatumik pimmagittumik Labrador Inuit ilikkusinginnik amma Kanuk KaujimasonguKattagiamut anginitsanut takunnâKattajunut.

Unikkausivut