ENGLISH/INUKTITUT
traditionandtransition@mun.ca        
    

    

Kaujititsinik kinaunimmikIkKaummajammik

KaikKujausimajuk ilijausimajuk omunga: Jill Jablonski, MA Siagunitaligiji

Labradorimi Takunnagatsaligijet Creative Arts Festival, Canadami akuniunippâk ingiggasimalittut inosuttuit pinguavinga, pigiasittausimajuk 1970-ni sakKititsisimavut pinguajunik puttunitsanik ilinniajunik ilinniavimmi uKausigigiallatâdlugit unikkausingit NunaKakKâsimajut inuit Labradorimi. Tânna tataminattuk katutjiKatigennik kamaKattavuk ullumi inosinginnik Labradorimiut, ammalu piulimatsidlutik siagunitanik allatausimajunik allaKutini, sakKititsigasuanginnadlutik piusituKanik sivunganinitanik ulllumimunut. Pinguadlutik inunnut tusâjausongudlutik tutsiagusingit, takunnadlutik sugusinik atujunik annugâtuKaminik kaminillu, ammalu takunnadlutik piusiusimajunik inosinni – uKumaitsaKattadlutik KanuiKattagatillu. Ammalu, Takunnagatsaligijet Labrador Creative Arts Festival piujummagiuvuk ilinniagutaulluni kamagiluallugit ammalu piugillugit pinguaguset.

PiusituKanik Asianguvalliajunillu Suliatsak, IkKaumajammik sunatuinnanik tigusiKattavuk Labrador Creative Arts Festival piKattajanginnik, unutsitigiadlugit. Âhammarik, IkKaumajammik KaikKujiKattavut inummaginnik ilaugunnagunnaitunik inosuttuit pinguatillugit utittigasuallugit takutsaulutik sakKitigasuajangit. Pingasuni jâriuniattuni PiusituKait Asianguvalliajuillu Kaujisattigiallanga Tim Borlase aiKattaniattuk Nunatsiavut nunalinginnut Hopedale, Makkovik, Nain, KipukKak ammalu Rigolettimut âkKisuigiattuluni inummaginik ilaujutsanik, pinguaKatautillugit nunagijamini. Inummaget pinguatet pigunnatut isumaminik âkKisuillutik pigatsaminik, ubvalu atugiallalugit allatausimajut sugusinut Labrador Creative Arts Festival takunnagatsani, sakKitiniallugit omalittilugit takutsaulutik, atausiagiallalutik. Asigiallanga tugâgutik suliatsami, sakKititsigiamut piuliukKataumajunik Labrador Creative Arts Festival allasimajanginnik. Tamakkua piuliukKataumajut takutitsiniammata Kanuk Inuit ilikKusingit ulinnaitaunitsanginnut, takugatsaulutillu pinguavimmi, asiangusimalittut 40 jârini Kângisimalittuni. Ammalu, piuliukKataumajut takutitsiniakKut ânanânik takugatsani pilluanguninginnilu Labradorimi inosuttuit.

IlinniaviliaKattavunga Memorial Ilinniavitsuanganut Newfoundland-imi nalunaikkutattâgasuadlunga Siagunitaligigiamut. PigutsalaukKunga appaligaKattadlunga pigutsevini Michigannimi, immaKâ sitondigâjuk Kaningininga Canadamiut nalunaikkutanganut. IsumaKalaungilanga Kuvianattukut ingiggagiamik sollu uvani IkKaumajammik suliatsamut tigujaulaugama. Tâvatuak, tamanna akKutiuvuk, ammalu asiagut suliatsagidlugu, pigumasimajaga. Tamanna tukiKavuk maggoni takKiusimajonni, atuatsilaukKunga ununnisanik 200-nit allatausimajunik, adjigengitunik atautsimit pâginâmmit 30-nut pâginânut, nallinginnik tigusigiamut allatausimajunik. Pijagetuagama, âkKisuilaukKunga nalunaikkutanik, ilanga katitsusimajaga alladlugit Labrador Creative Arts Festival pinguagusingit allatausimajuvinet 20-ni jârini Kângisimalittuni.Pijagetuagakkit alladlugit, iliukKaniadlugit pinguaguset unuttunut allasimajakkanut. Tamakkua allasimajakka iluingaivut allatausimajunik sugusinut Nunatsiavut nunalinginni, pigumalualauttaga allasimajuk ammalu tânnauniattuk Kimiggudlugu annigilauttaga.

PiuliukKataumajut ilumiutaKalâmmijut siagunitanik uKausinillu taikkunangat ilaujunit Labrador Creative Arts Festivalimut. PiuliukKagiangit tamakkua uKauset, tingilaukKunga satjugiami nunalinnut Makkovik ammalu Nainimut apitsugiattudlunga sivungani ilauKattasimajunik pitjutigidlugit Ulllusiuniusimajut. Ammalu, nunalinnegama, ikajulaukKunga sanajautillugu IkKaumajammik pinguagait Asiujijaumajut Nagvâtaumajullu (Nain) amma Pulâgiagitsi (Makkovik) ammalu apitsudlugit pinguatet Kanuk pisimammangâta pinguadlutik ominga IkKaumajammik. Pijagemmata pinguagatsait, utiniadlunga suliaKapviganut Goose Bay-mi adjiliugiattudlugit 40-ni jârini allatausimajuvinet, âkKisuidlunga sivullipâmik Kagitaujanodlugit ilangit.

Tamanna tataminnamagilauttuk piusigilauttaga. AiKattalaukKunga kisiani aiviusonut tingijokkut, umiakkut, ubvalu sikidokkut/Kimutsikut. Nanuit amingit KangataKattadlutik iniukKavini ammalu sikidokkut sukkanikisautijut sikumi Kuvianattotillugu takKingani Mai. KuviasuKattalaukKunga pisugaKataudlunga Makkkovimmi tataminattut KakKasuangit. Goose Bay-mi, silakKijaKattadlunga siKinigâtsiavammi ullânit finfimi unnudlugunut ailfamut unnuami. Nain-imi, takulaukKunga kajumik Kimmimik tailauttaga kajuk. Angutiup saniani itsivalaukKunga tingijommi Nainilialidluta uKalauttuk nagligijatsatâgiaKangitunga taikanennigani, tâvatuak ommatiga ânnilauttuk Kimailigama Kimmimik.

Allasimajutigut, KaujilaukKunga unikkausittigut Sikarettuluavinialummik, inunnik tammatitsiKattasimajuk akKutini silanniluttilugu, ubvalu piulitsiKattasimajuk silannilummi akKutini silannilutsuami. Kaujilauttaga Mother Bucksaw, ijuguk kitjaiKattasimajuk nujanik kinatuinnamut aittutaugumagunnaigami sikaremmik. KaujilaukKunga unikkausinik nukappiat katititauKattajut tuktunut, ammalu ijuguit ikajuKattadlutik nukappianik omajutsiutillugit Taggajâliunnikut sivungani pinguagijauKattasimajunik takulaukKunga inosuttuit Labradorimi ikKasuningit pilukâttauKattajunik, avatet paigijaugiaKaningit, ammalu Kanuk nunattâsimajut ilangit Labradorimi nunalet attutauniKasimaningit inuit tamânegettuit. Naillitillugu, takulaukKunga piusiuKattasimajunik ammalu unikkausinik ilutsitâttaumajut inuit Labradorimi.

Suliaga Kuvianattoluttuk. Ilangit allasimajut uvannik ijuttisiKattalauttut, ilangillu sollu pisimajut allatausimajunit Maligatsanit. Unuttumaginik allatausimajuKalaukKuk. Atautsimi pinguagusimmi, tugâgutinga pilluangusimajop piungilititsisimajuk inuit ilitagijaugutinginnik allasimajuni sulingituni. Asiagullu, pilluangusimajuk pinniadluni pitjutautillugu TuKunnik kitsautigijautillugu Kanimmasialosimajuk, tuKugaisimajuk ilonnakasânginnik Kaujimajanginnik nagligijaminillu. Taimâtsiak uKautausok allataumajuit ilillugit IkKaumajammik suliatsami. Pulâgialaugitsi, tutsiaguset katitsutaumajut ullusiuttauninga Canada 150-nik jârinik, adjiusialaungituk Nain-imi Asiujijausimajut Nagvâtausimajunillu, ilingasimajuk asiujijaulittunik ilikKusinik.

Labradorimegama uKumaittolaummijuk. Ilakka nallelonnet taimâk Kaningitigijumut ailautsimangitut taggânut. kinamillonet Kaujimalaungilanga Labradorimi. InutolaukKunga kappiasudlungalu. Akunialunut suliaKaKattadlunga, pisuKattadlunga sitondiup agvanganik suliaKapviganut Goose Bay-mi, aputikkut siugakkulu. Ammalu ”Nunatsuamenniga” asiangutitsilauttuk uvannik. PigutsalaukKunga Michigan-imi, isumagilaukKunga imminik taggamiunguniganik, tâvatuak Labrador uvannik asiangutitsisiammagilauttuk nutânik Isumakkut Kanuk taggamiut tukiKammangâta. Angiggagani inuKavuk immaKâ 5,000-tinik, niugguKattaKâdlunga nunalinnut ikittunik hontanit, KaujimagunnaiKunga pisimammangâmma mikijumit nunamit. IsumaKalaungilanga niuviatsanik ammalu pigumajaujunik niuviatsanik niKitsanillu kisiani akileKattaligama akitunitsamik 5dâlamit Pop Tarts-inik, ammalu takudlugit ubvautet iggutuigutet 40 dâlait ponginni. Taimaigaluattilugu ilonnâgut, nakutsanannimik KaujilaukKunga ulinnaisinikkut, adjigengitunik adjigenillu ilutsitâgiKattajut inunnik Taggâni Americami.