ENGLISH/INUKTITUT
traditionandtransition@mun.ca           

Unikkausivut



UKâlalautta Inuttitut!

............................................

Suttu-Kalimmangat

Memorial Ilinniavitsuak

Tânna Newfoundland, Labradorimilu ilinniavitsuavituangummat, Memorial pimmagittojumik kamagiaKattitaujuk inunnik tapvani prâvinsimi, ammalu nunaKakKâsimajojunik INUNNIk tamâni angiggaKannigânginnaKattasimajunik.  Tânna ilinniavitsuak pingutitausimajuk ikKaumajaugutigijautillugu Newfoundlanut, Labradorimiunullu inogunnaisimajunut Silatsuami Unatanniusimajuni.  Tugâgutigisimajanga taitsumaniutillugu, taimailingatsainatuk mânnamunut, ikajugiamut piguvalliatitsinimmik piunitsamik sivunitsamik tamâni prâvinsimi, silatsuamilu.

Una ilinniavitsuap pigasuagutinginnut uKausituKanga Provehito in Altum (Sivumualautta pitsatusivallianimmut), atatitsijuk pigasuagutigijaujumik aninningitigut Kaujisannimi tapvani, ajaugutiKadluni killilittauvinginnik tukisiutitsanik ammalu piusigijaugunnatunik KaujimanniKagiamut.

Memorial ilitatsiniKajuk pigiaKanniminik suliaKaKatiKagiamut nunaKakKâsimajunik inunnik tamâni prâvinsimi; tamakkua piusigiKattatangit Kaujimannigijanginni amma KaujimaKatigegusigijanginni pimmagittumik ikajutsimagiKattasimalittut Kaujimannigijaujunik ammalu tukisinnigijaujunik Memoriallimi unuttugiallâni jârini. AkKutigijautillugit piusitsaliugutigiKattatangit Kaujisannimi ilingattiKattatanginnut tânna ilinniavitsuak killigiudjiutiKasimajuk KaujisanniKagiamut tamainnik NunaKakKâsimajojunik amma Aujuittumi, Taggamilu IniKajunik. Tamanna kajusititsigiallasimajuk Memorialiup killigiudjiutigisimajanganik atsugotiKagiallagiamut tukisiusigijanginnik Nunatsiavuttimik, amma Labradorimiunik Inunnik.

Pingutitausimajuk 1925imi, 20 tausindikasânik ilinniatitsidlutik siamangajuni sitamani ilinniatitsivigiKattatanginni ilonnâni prâvinsimi, Memorial tânnatodluni pigunnautiKajuk ikajutsiniKagiamut KaujisaKatiKannimut Labradorimiunik Inunnik, ammalu ikajuttigeKatiKagiamut Inunnik Kaujisattinik suliaKajunik nunaKutigijanginni. Ununnisaulittuni hontait jaret apvanganit Inunnut-ilingajunik KaujisanniKaKattasimanimminut, Memorial sakKititsisimalittuk pitsatujumik kinguvâgegiallâjuni piKatigegusinnik Nunatsiavut iluani. Tainna PiusituKaujuit Asianguvalliajuillu Ikajuttigegutinniujuk ilagiallangaujuk ingiggatitsigiallajuk, pivalliatitsigialladlunilu tamatsuminga piKatigegusimmik.

Kaujisattet pisimajut Memorialimit suliaKaKatiKasimalittut Labradorimiunik Inunnik sutaijammagittumik adjigengituni suliangusimalittuni; ilingajunut itsasuanitaliginimmut, allasângutitsinimmut, niuggutiliginimmulu. Unuttut Kaujisattet pisimajut Memorialimit ilauKatauliaKisimalittut nunaliujumi Nunatsiavut iluanejumi amma taikkua suliagiKattatangit pimmagittumik ikajutsimagiKattasimalittut Labradorimiunik Inunnik tukisiniKanitsaulidlutik imminik.

Taitsumani Memorialiup SulaiKapvingani taijaujumi Memorial's Labrador Institute Happy Valley-Goose Baymi unuttumaget Labradorimiunut Inunnut ilingallagittunik KaujisattaujuKaKattavuk.  Tainna suliaKapvik inigijauKattatuk ilinniatitsigiamut ilinniagiallagumajunik Nunatsiavuttimi ânniasiupvimi paitsijiugiamut, niKitâtitsijiligijiugiamut, amma ilinniatitsijiugiamut.

Unuttut Nunatsiavuttimi ilinniatet ilauKattatut Memorial Ilinniavitsuanganut. Tainna ilinniavitsuak mânnaKamik sakKititsisimalauttuk pimmagittojunik AngajukKâmut UKaudjigiajiullutik katimattiujutsanik atâgut NunaKakKâsimajut kamagijaugutingita, Kimiggulâttunik ammalu sivumuatitsilutik nunaKakKâsimajut ilinniatitaugutinginnik, ammalu ikajullutik ilinniavitsuamik sakKititsigiamut Kaujimajaugutitsanik pillugit nunaKakKâsimajuit Inuit. Tainna ilinniavitsuak pivalliatitsilimmijut ilitagijaugutitsanginnut nalunaikkutamik ilingajumik NunaKakKâsimajuit Ilinniagutinginnut, ammalu Kaujijautitsisimalittut pannaigutiliulinniminik âkKisuigiamut piusituKait piulimajauvitsangita initsanganik NunaKakKâsimajunut ilinniatinut.